เตน โข ปน สมเยน อญฺญตโร ภิกฺขุ อธิมาเนน อญฺญํ พฺยากาสิ. ตสฺส กุกฺกุจฺจํ อโหสิ “ภควตา สิกฺขาปทํ ปญฺญตฺตํ, กจฺจิ นุ โข อหํ ปาราชิกํ อาปตฺติํ อาปนฺโน”ติ. ภควโต เอตมตฺถํ อาโรเจสิ. อนาปตฺติ ภิกฺขุ อธิมาเนนาติ.

เตน โข ปน สมเยน อญฺญตโร ภิกฺขุ ปณิธาย อรญฺเญ วิหรติ “เอวํ มํ ชโน สมฺภาเวสฺสตี”ติ. ตํ ชโน สมฺภาเวสิ. ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ ปาราชิกสฺส, น จ ภิกฺขเว ปณิธาย อรญฺเญ วตฺถพฺพํ, โย วเสยฺย, อาปตฺติ ทุกฺกฏสฺสาติ.

เตน โข ปน สมเยน อญฺญตโร ภิกฺขุ ปณิธาย ปิณฺฑาย จรติ “เอวํ มํ ชโน สมฺภาเวสฺสตี”ติ. ตํ ชโน สมฺภาเวสิ. ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ ปาราชิกสฺส, น จ ภิกฺขเว ปณิธาย ปิณฺฑาย จริตพฺพํ, โย จเรยฺย, อาปตฺติ ทุกฺกฏสฺสาติ.

เตน โข ปน สมเยน อญฺญตโร ภิกฺขุ อญฺญตรํ ภิกฺขุํ เอตทโวจ “เย อาวุโส อมฺหากํ อุปชฺฌายสฺส สทฺธิวิหาริกา สพฺเพว อรหนฺโต”ติ. ตสฺส กุกฺกุจฺจํ อโหสิ ฯเปฯ กิํจิตฺโต ตฺวํ ภิกฺขูติ. อุลฺลปนาธิปฺปาโย อหํ ภควาติ. อนาปตฺติ ภิกฺขุ ปาราชิกสฺส, อาปตฺติ ถุลฺลจฺจยสฺสาติ.

เตน โข ปน สมเยน อญฺญตโร ภิกฺขุ อญฺญตรํ ภิกฺขุํ เอตทโวจ “เย อาวุโส อมฺหากํ อุปชฺฌายสฺส อนฺเตวาสิกา, สพฺเพว มหิทฺธิกา มหานุภาวา”ติ. ตสฺส กุกฺกุจฺจํ อโหสิ ฯเปฯ กิํจิตฺโต ตฺวํ ภิกฺขูติ. อุลฺลปนาธิปฺปาโย อหํ ภควาติ. อนาปตฺติ ภิกฺขุ ปาราชิกสฺส, อาปตฺติ ถุลฺลจฺจยสฺสาติ.

เตน โข ปน สมเยน อญฺญตโร ภิกฺขุ ปณิธาย จงฺกมติ. ปณิธาย ติฏฺฐติ. ปณิธาย นิสีทติ. ปณิธาย เสยฺยํ กปฺเปติ “เอวํ มํ ชโน สมฺภาเวสฺสตี”ติ. ตํ ชโน สมฺภาเวสิ. ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ ปาราชิกสฺส, น จ ภิกฺขเว ปณิธาย เสยฺยา กปฺเปตพฺพา, โย กปฺเปยฺย, อาปตฺติ ทุกฺกฏสฺสาติ.

เตน โข ปน สมเยน อญฺญตโร ภิกฺขุ อญฺญตรสฺส ภิกฺขุโน อุตฺตริมนุสฺสธมฺมํ อุลฺลปติ. โสปิ เอวมาห “มยฺหํปิ อาวุโส สญฺโญชนา ปหีนา”ติ. ตสฺส กุกฺกุจฺจํ อโหสิ ฯเปฯ อาปตฺติํ ตฺวํ ภิกฺขุ อาปนฺโน ปาราชิกนฺติ.

เตน โข ปน สมเยน อญฺญตโร ภิกฺขุ รโหคโต อุตฺตริมนุสฺสธมฺมํ อุลฺลปติ. ปรจิตฺตวิทู ภิกฺขุ ตํ ภิกฺขุํ อปสาเทสิ “มา อาวุโส เอวรูปํ อภณิ, นตฺเถโส ตุยฺหนฺ”ติ. ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ ปาราชิกสฺส, อาปตฺติ ทุกฺกฏสฺสาติ.

เตน โข ปน สมเยน อญฺญตโร ภิกฺขุ รโหคโต อุตฺตริมนุสฺสธมฺมํ อุลฺลปติ. เทวตา ตํ ภิกฺขุํ อปสาเทสิ “มา ภนฺเต เอวรูปํ อภณิ, นตฺเถโส ตุยฺหนฺ”ติ. ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ ปาราชิกสฺส, อาปตฺติ ทุกฺกฏสฺสาติ.

เตน โข ปน สมเยน อญฺญตโร ภิกฺขุ อญฺญตรํ อุปาสกํ เอตทโวจ “โย อาวุโส ตุยฺหํ วิหาเร วสติ, โส ภิกฺขุ อรหา”ติ. โส จ ตสฺส วิหาเร วสติ, ตสฺส กุกฺกุจฺจํ อโหสิ ฯเปฯ กิํจิตฺโต ตฺวํ ภิกฺขูติ. อุลฺลปนาธิปฺปาโย อหํ ภควาติ. อนาปตฺติ ภิกฺขุ ปาราชิกสฺส, อาปตฺติ ถุลฺลจฺจยสฺสาติ.

เตน โข ปน สมเยน อญฺญตโร ภิกฺขุ อญฺญตรํ อุปาสกํ เอตทโวจ “ยํ ตฺวํ อาวุโส อุปฏฺเฐสิ จีวรปิณฺฑปาตเสนาสนคิลานปฺปจฺจยเภสชฺชปริกฺขาเรน, โส ภิกฺขุ อรหา”ติ. โส จ ตํ อุปฏฺเฐติ จีวรปิณฺฑปาตเสนาสนคิลานปฺปจฺจยเภสชฺชปริกฺขาเรน, ตสฺส กุกฺกุจฺจํ อโหสิ ฯเปฯ กิํจิตฺโต ตฺวํ ภิกฺขูติ. อุลฺลปนาธิปฺปาโย อหํ ภควาติ. อนาปตฺติ ภิกฺขุ ปาราชิกสฺส, อาปตฺติ ถุลฺลจฺจยสฺสาติ.

เตน โข ปน สมเยน อญฺญตโร ภิกฺขุ คิลาโน โหติ. ตํ ภิกฺขู เอตทโวจุํ “อตฺถายสฺมโต อุตฺตริมนุสฺสธมฺโม”ติ. นาวุโส ทุกฺกรํ อญฺญํ พฺยากาตุนฺติ. ตสฺส กุกฺกุจฺจํ อโหสิ “เย โข เต ภควโต สาวกา, เต เอวํ วเทยฺยุํ, อหญฺจมฺหิ น ภควโต สาวโก, กจฺจิ นุ โข อหํ ปาราชิกํ อาปตฺติํ อาปนฺโน”ติ. ภควโต เอตมตฺถํ อาโรเจสิ. กิํจิตฺโต ตฺวํ ภิกฺขูติ. อนุลฺลปนาธิปฺปาโย อหํ ภควาติ. อนาปตฺติ ภิกฺขุ อนุลฺลปนาธิปฺปายสฺสาติ.

เตน โข ปน สมเยน อญฺญตโร ภิกฺขุ คิลาโน โหติ. ตํ ภิกฺขู เอตทโวจุํ “อตฺถายสฺมโต อุตฺตริมนุสฺสธมฺโม”ติ. อาราธนีโย โข อาวุโส ธมฺโม อารทฺธวีริเยนาติ. ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ อนุลฺลปนาธิปฺปายสฺสาติ.

เตน โข ปน สมเยน อญฺญตโร ภิกฺขุ คิลาโน โหติ. ตํ ภิกฺขู เอตทโวจุํ “มา โข อาวุโส ภายี”ติ. นาหํ อาวุโส มจฺจุโน ภายามีติ. ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ อนุลฺลปนาธิปฺปายสฺสาติ.

เตน โข ปน สมเยน อญฺญตโร ภิกฺขุ คิลาโน โหติ. ตํ ภิกฺขู เอตทโวจุํ “มา โข อาวุโส ภายี”ติ. โย นูนาวุโส วิปฺปฏิสารี อสฺส, โส ภาเยยฺยาติ. ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ อนุลฺลปนาธิปฺปายสฺสาติ.

เตน โข ปน สมเยน อญฺญตโร ภิกฺขุ คิลาโน โหติ. ตํ ภิกฺขู เอตทโวจุํ “อตฺถายสฺมโต อุตฺตริมนุสฺสธมฺโม”ติ. อาราธนีโย โข อาวุโส ธมฺโม สมฺมาปยุตฺเตนาติ. ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ อนุลฺลปนาธิปฺปายสฺสาติ.

เตน โข ปน สมเยน อญฺญตโร ภิกฺขุ คิลาโน โหติ. ตํ ภิกฺขู เอตทโวจุํ “อตฺถายสฺมโต อุตฺตริมนุสฺสธมฺโม”ติ. อาราธนีโย โข อาวุโส ธมฺโม อารทฺธวีริเยนาติ. ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ อนุลฺลปนาธิปฺปายสฺสาติ.

เตน โข ปน สมเยน อญฺญตโร ภิกฺขุ คิลาโน โหติ. ตํ ภิกฺขู เอตทโวจุํ “อตฺถายสฺมโต อุตฺตริมนุสฺสธมฺโม”ติ. อาราธนีโย โข อาวุโส ธมฺโม ยุตฺตโยเคนาติ. ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ อนุลฺลปนาธิปฺปายสฺสาติ.

เตน โข ปน สมเยน อญฺญตโร ภิกฺขุ คิลาโน โหติ. ตํ ภิกฺขู เอตทโวจุํ “กจฺจาวุโส ขมนียํ, กจฺจิ ยาปนียนฺ”ติ. นาวุโส สกฺกา เยน วา เตน วา อธิวาเสตุนฺติ. ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ อนุลฺลปนาธิปฺปายสฺสาติ.

เตน โข ปน สมเยน อญฺญตโร ภิกฺขุ คิลาโน โหติ. ตํ ภิกฺขู เอตทโวจุํ “กจฺจาวุโส ขมนียํ, กจฺจิ ยาปนียนฺ”ติ. นาวุโส สกฺกา ปุถุชฺชเนน อธิวาเสตุนฺติ. ตสฺส กุกฺกุจฺจํ อโหสิ ฯเปฯ กิํจิตฺโต ตฺวํ ภิกฺขูติ. อุลฺลปนาธิปฺปาโย อหํ ภควาติ. อนาปตฺติ ภิกฺขุ ปาราชิกสฺส, อาปตฺติ ถุลฺลจฺจยสฺสาติ.

เตน โข ปน สมเยน อญฺญตโร พฺราหฺมโณ ภิกฺขู นิมนฺเตตฺวา เอตทโวจ “อายนฺตุ โภนฺโต อรหนฺโต”ติ. เตสํ กุกฺกุจฺจํ อโหสิ “มยญฺจมฺห น อรหนฺโต, อยญฺจ พฺราหฺมโณ อเมฺห อรหนฺตวาเทน สมุทาจรติ, กถํ นุ โข อเมฺหหิ ปฏิปชฺชิตพฺพนฺ”ติ. ภควโต เอตมตฺถํ อาโรเจสุํ. อนาปตฺติ ภิกฺขเว ปสาทภญฺเญติ.

เตน โข ปน สมเยน อญฺญตโร พฺราหฺมโณ ภิกฺขู นิมนฺเตตฺวา เอตทโวจ “นิสีทนฺตุ โภนฺโต อรหนฺโต”ติ. “ภุญฺชนฺตุ โภนฺโต อรหนฺโต”ติ. “ตปฺเปนฺตุ โภนฺโต อรหนฺโต”ติ. “คจฺฉนฺตุ โภนฺโต อรหนฺโต”ติ. เตสํ กุกฺกุจฺจํ อโหสิ “มยญฺจมฺห น อรหนฺโต, อยญฺจ พฺราหฺมโณ อเมฺห อรหนฺตวาเทน สมุทาจรติ, กถํ นุ โข อเมฺหหิ ปฏิปชฺชิตพฺพนฺ”ติ. ภควโต เอตมตฺถํ อาโรเจสุํ. อนาปตฺติ ภิกฺขเว ปสาทภญฺเญติ.

เตน โข ปน สมเยน อญฺญตโร ภิกฺขุ อญฺญตรสฺส ภิกฺขุโน อุตฺตริมนุสฺสธมฺมํ อุลฺลปติ. โสปิ เอวมาห “มยฺหํปิ อาวุโส อาสวา ปหีนา”ติ. ตสฺส กุกฺกุจฺจํ อโหสิ ฯเปฯ อาปตฺติํ ตฺวํ ภิกฺขุ อาปนฺโน ปาราชิกนฺติ.

เตน โข ปน สมเยน อญฺญตโร ภิกฺขุ อญฺญตรสฺส ภิกฺขุโน อุตฺตริมนุสฺสธมฺมํ อุลฺลปติ. โสปิ เอวมาห “มยฺหํปิ อาวุโส เอเต ธมฺมา สํวิชฺชนฺตี”ติ. ตสฺส กุกฺกุจฺจํ อโหสิ ฯเปฯ อาปตฺติํ ตฺวํ ภิกฺขุ อาปนฺโน ปาราชิกนฺติ.

เตน โข ปน สมเยน อญฺญตโร ภิกฺขุ อญฺญตรสฺส ภิกฺขุโน อุตฺตริมนุสฺสธมฺมํ อุลฺลปติ. โสปิ เอวมาห “อหมฺปาวุโส เตสุ ธมฺเมสุ สนฺทิสฺสามี”ติ. ตสฺส กุกฺกุจฺจํ อโหสิ ฯเปฯ อาปตฺติํ ตฺวํ ภิกฺขุ อาปนฺโน ปาราชิกนฺติ.

เตน โข ปน สมเยน อญฺญตรํ ภิกฺขุํ ญาตกา เอตทโวจุํ “เอหิ ภนฺเต อคารํ อชฺฌาวสา”ติ. อภพฺโพ โข อาวุโส มาทิโส อคารํ อชฺฌาวสิตุนฺติ. ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ อนุลฺลปนาธิปฺปายสฺสาติ.

เตน โข ปน สมเยน อญฺญตรํ ภิกฺขุํ ญาตกา เอตทโวจุํ “เอหิ ภนฺเต กาเม ปริภุญฺชา”ติ. อาวฏา เม อาวุโส กามาติ. ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ อนุลฺลปนาธิปฺปายสฺสาติ.

เตน โข ปน สมเยน อญฺญตรํ ภิกฺขุํ ญาตกา เอตทโวจุํ “อภิรมสิ ภนฺเต”ติ. อภิรโต อหํ อาวุโส ปรมาย อภิรติยาติ. ตสฺส กุกฺกุจฺจํ อโหสิ “เย โข เต ภควโต สาวกา, เต เอวํ วเทยฺยุํ, อหญฺจมฺหิ น ภควโต สาวโก, กจฺจิ นุ โข อหํ ปาราชิกํ อาปตฺติํ อาปนฺโน”ติ. ภควโต เอตมตฺถํ อาโรเจสิ. กิํจิตฺโต ตฺวํ ภิกฺขูติ. อนุลฺลปนาธิปฺปาโย อหํ ภควาติ. อนาปตฺติ ภิกฺขุ อนุลฺลปนาธิปฺปายสฺสาติ.

เตน โข ปน สมเยน สมฺพหุลา ภิกฺขู กติกํ กตฺวา อญฺญตรสฺมิํ อาวาเส วสฺสํ อุปคจฺฉิํสุ “โย อิมมฺหา อาวาสา ปฐมํ ปกฺกมิสฺสติ, ตํ มยํ อรหาติ ชานิสฺสามา”ติ. อญฺญตโร ภิกฺขุ “มํ อรหาติ ชานนฺตู”ติ ตมฺหา อาวาสา ปฐมํ ปกฺกามิ. ตสฺส กุกฺกุจฺจํ อโหสิ ฯเปฯ อาปตฺติํ ตฺวํ ภิกฺขุ อาปนฺโน ปาราชิกนฺติ.