តេន សមយេន ពុទ្ធោ ភគវា វេរញ្ជាយំ វិហរតិ នឡេរុបុចិមន្ទមូលេ មហតា ភិក្ខុសំឃេន សទ្ធឹ បញ្ចមត្តេហិ ភិក្ខុសតេហិ. អស្សោសិ ខោ វេរញ្ជោ ព្រាហ្មណោ “សមណោ ខលុ ភោ គោតមោ សក្យបុត្តោ សក្យកុលា បព្ពជិតោ វេរញ្ជាយំ វិហរតិ នឡេរុបុចិមន្ទមូលេ មហតា ភិក្ខុសំឃេន សទ្ធឹ បញ្ចមត្តេហិ ភិក្ខុសតេហិ, តំ ខោ បន ភវន្តំ គោតមំ ឯវំ កល្យាណោ កិត្តិសទ្ទោ អព្ភុគ្គតោ ‘ឥតិបិ សោ ភគវា អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោ បុរិសទម្មសារថិ សត្ថា ទេវមនុស្សានំ ពុទ្ធោ ភគវា, សោ ឥមំ លោកំ សទេវកំ សមារកំ សព្រហ្មកំ សស្សមណព្រាហ្មណឹ បជំ សទេវមនុស្សំ សយំ អភិញ្ញា សច្ឆិកត្វា បវេទេតិ, សោ ធម្មំ ទេសេតិ អាទិកល្យាណំ មជ្ឈេកល្យាណំ បរិយោសានកល្យាណំ សាត្ថំ សព្យញ្ជនំ, កេវលបរិបុណ្ណំ បរិសុទ្ធំ ព្រហ្មចរិយំ បកាសេតិ, សាធុ ខោ បន តថារូបានំ អរហតំ ទស្សនំ ហោតី”តិ.

អថ ខោ វេរញ្ជោ ព្រាហ្មណោ យេន ភគវា តេនុបសង្កមិ, ឧបសង្កមិត្វា ភគវតា សទ្ធឹ សម្មោទិ, សម្មោទនីយំ កថំ សារណីយំ វីតិសារេត្វា ឯកមន្តំ និសីទិ, ឯកមន្តំ និសិន្នោ ខោ វេរញ្ជោ ព្រាហ្មណោ ភគវន្តំ ឯតទវោច “សុតំ មេតំ ភោ គោតម ‘ន សមណោ គោតមោ ព្រាហ្មណេ ជិណ្ណេ វុឌ្ឍេ មហល្លកេ អទ្ធគតេ វយោអនុប្បត្តេ អភិវាទេតិ វា បច្ចុដ្ឋេតិ វា អាសនេន វា និមន្តេតី’តិ. តយិទំ ភោ គោតម តថេវ, ន ហិ ភវំ គោតមោ ព្រាហ្មណេ ជិណ្ណេ វុឌ្ឍេ មហល្លកេ អទ្ធគតេ វយោអនុប្បត្តេ អភិវាទេតិ វា បច្ចុដ្ឋេតិ វា អាសនេន វា និមន្តេតិ. តយិទំ ភោ គោតម ន សម្បន្នមេវា”តិ.

នាហំ តំ ព្រាហ្មណ បស្សាមិ សទេវកេ លោកេ សមារកេ សព្រហ្មកេ សស្សមណព្រាហ្មណិយា បជាយ សទេវមនុស្សាយ យមហំ អភិវាទេយ្យំ វា បច្ចុដ្ឋេយ្យំ វា អាសនេន វា និមន្តេយ្យំ. យំ ហិ ព្រាហ្មណ តថាគតោ អភិវាទេយ្យ វា បច្ចុដ្ឋេយ្យ វា អាសនេន វា និមន្តេយ្យ, មុទ្ធាបិ តស្ស វិបតេយ្យា”តិ.

អរសរូបោ ភវំ គោតមោតិ. អត្ថិ ខ្វេស ព្រាហ្មណ បរិយាយោ, យេន មំ បរិយាយេន សម្មា វទមានោ វទេយ្យ “អរសរូបោ សមណោ គោតមោ”តិ. យេ តេ ព្រាហ្មណ រូបរសា សទ្ទរសា គន្ធរសា រសរសា ផោដ្ឋព្ពរសា, តេ តថាគតស្ស បហីនា ឧច្ឆិន្នមូលា តាលាវត្ថុកតា អនភាវំកតា អាយតឹ អនុប្បាទធម្មា. អយំ ខោ ព្រាហ្មណ បរិយាយោ, យេន មំ បរិយាយេន សម្មា វទមានោ វទេយ្យ “អរសរូបោ សមណោ គោតមោ”តិ, នោ ច ខោ យំ ត្វំ សន្ធាយ វទេសីតិ.

និព្ភោគោ ភវំ គោតមោតិ. អត្ថិ ខ្វេស ព្រាហ្មណ បរិយាយោ, យេន មំ បរិយាយេន សម្មា វទមានោ វទេយ្យ “និព្ភោគោ សមណោ គោតមោ”តិ. យេ តេ ព្រាហ្មណ រូបភោគា សទ្ទភោគា គន្ធភោគា រសភោគា ផោដ្ឋព្ពភោគា, តេ តថាគតស្ស បហីនា ឧច្ឆិន្នមូលា តាលាវត្ថុកតា អនភាវំកតា អាយតឹ អនុប្បាទធម្មា. អយំ ខោ ព្រាហ្មណ បរិយាយោ, យេន មំ បរិយាយេន សម្មា វទមានោ វទេយ្យ “និព្ភោគោ សមណោ គោតមោ”តិ, នោ ច ខោ យំ ត្វំ សន្ធាយ វទេសីតិ.

អកិរិយវាទោ ភវំ គោតមោតិ. អត្ថិ ខ្វេស ព្រាហ្មណ បរិយាយោ, យេន មំ បរិយាយេន សម្មា វទមានោ វទេយ្យ “អកិរិយវាទោ សមណោ គោតមោ”តិ. អហំ ហិ ព្រាហ្មណ អកិរិយំ វទាមិ កាយទុច្ចរិតស្ស វចីទុច្ចរិតស្ស មនោទុច្ចរិតស្ស, អនេកវិហិតានំ បាបកានំ អកុសលានំ ធម្មានំ អកិរិយំ វទាមិ. អយំ ខោ ព្រាហ្មណ បរិយាយោ, យេន មំ បរិយាយេន សម្មា វទមានោ វទេយ្យ “អកិរិយវាទោ សមណោ គោតមោ”តិ, នោ ច ខោ យំ ត្វំ សន្ធាយ វទេសីតិ.