තේන සමයේන බුද්ධෝ භගවා වේරඤ්ජායං විහරති නළේරුපුචිමන්දමූලේ මහතා භික්ඛුසංඝේන සද්ධිං පඤ්චමත්තේහි භික්ඛුසතේහි. අස්සෝසි ඛෝ වේරඤ්ජෝ බ්‍රාහ්මණෝ “සමණෝ ඛලු භෝ ගෝතමෝ සක්‍යපුත්තෝ සක්‍යකුලා පබ්බජිතෝ වේරඤ්ජායං විහරති නළේරුපුචිමන්දමූලේ මහතා භික්ඛුසංඝේන සද්ධිං පඤ්චමත්තේහි භික්ඛුසතේහි, තං ඛෝ පන භවන්තං ගෝතමං ඒවං කල්‍යාණෝ කිත්තිසද්දෝ අබ්භුග්ගතෝ ‘ඉතිපි සෝ භගවා අරහං සම්මාසම්බුද්ධෝ විජ්ජාචරණසම්පන්නෝ සුගතෝ ලෝකවිදූ අනුත්තරෝ පුරිසදම්මසාරථි සත්ථා දේවමනුස්සානං බුද්ධෝ භගවා, සෝ ඉමං ලෝකං සදේවකං සමාරකං සබ්‍රහ්මකං සස්සමණබ්‍රාහ්මණිං පජං සදේවමනුස්සං සයං අභිඤ්ඤා සච්ඡිකත්වා පවේදේති, සෝ ධම්මං දේසේති ආදිකල්‍යාණං මජ්ඣේකල්‍යාණං පරියෝසානකල්‍යාණං සාත්ථං සබ්‍යඤ්ජනං, කේවලපරිපුණ්ණං පරිසුද්ධං බ්‍රහ්මචරියං පකාසේති, සාධු ඛෝ පන තථාරූපානං අරහතං දස්සනං හෝතී”ති.

අථ ඛෝ වේරඤ්ජෝ බ්‍රාහ්මණෝ යේන භගවා තේනුපසඞ්කමි, උපසඞ්කමිත්වා භගවතා සද්ධිං සම්මෝදි, සම්මෝදනීයං කථං සාරණීයං වීතිසාරේත්වා ඒකමන්තං නිසීදි, ඒකමන්තං නිසින්නෝ ඛෝ වේරඤ්ජෝ බ්‍රාහ්මණෝ භගවන්තං ඒතදවෝච “සුතං මේතං භෝ ගෝතම ‘න සමණෝ ගෝතමෝ බ්‍රාහ්මණේ ජිණ්ණේ වුඩ්ඪේ මහල්ලකේ අද්ධගතේ වයෝඅනුප්පත්තේ අභිවාදේති වා පච්චුට්ඨේති වා ආසනේන වා නිමන්තේතී’ති. තයිදං භෝ ගෝතම තථේව, න හි භවං ගෝතමෝ බ්‍රාහ්මණේ ජිණ්ණේ වුඩ්ඪේ මහල්ලකේ අද්ධගතේ වයෝඅනුප්පත්තේ අභිවාදේති වා පච්චුට්ඨේති වා ආසනේන වා නිමන්තේති. තයිදං භෝ ගෝතම න සම්පන්නමේවා”ති.

නාහං තං බ්‍රාහ්මණ පස්සාමි සදේවකේ ලෝකේ සමාරකේ සබ්‍රහ්මකේ සස්සමණබ්‍රාහ්මණියා පජාය සදේවමනුස්සාය යමහං අභිවාදේය්‍යං වා පච්චුට්ඨේය්‍යං වා ආසනේන වා නිමන්තේය්‍යං. යං හි බ්‍රාහ්මණ තථාගතෝ අභිවාදේය්‍ය වා පච්චුට්ඨේය්‍ය වා ආසනේන වා නිමන්තේය්‍ය, මුද්ධාපි තස්ස විපතේය්‍යා”ති.

අරසරූපෝ භවං ගෝතමෝති. අත්ථි ඛ්වේස බ්‍රාහ්මණ පරියායෝ, යේන මං පරියායේන සම්මා වදමානෝ වදේය්‍ය “අරසරූපෝ සමණෝ ගෝතමෝ”ති. යේ තේ බ්‍රාහ්මණ රූපරසා සද්දරසා ගන්ධරසා රසරසා ඵෝට්ඨබ්බරසා, තේ තථාගතස්ස පහීනා උච්ඡින්නමූලා තාලාවත්ථුකතා අනභාවංකතා ආයතිං අනුප්පාදධම්මා. අයං ඛෝ බ්‍රාහ්මණ පරියායෝ, යේන මං පරියායේන සම්මා වදමානෝ වදේය්‍ය “අරසරූපෝ සමණෝ ගෝතමෝ”ති, නෝ ච ඛෝ යං ත්වං සන්ධාය වදේසීති.

නිබ්භෝගෝ භවං ගෝතමෝති. අත්ථි ඛ්වේස බ්‍රාහ්මණ පරියායෝ, යේන මං පරියායේන සම්මා වදමානෝ වදේය්‍ය “නිබ්භෝගෝ සමණෝ ගෝතමෝ”ති. යේ තේ බ්‍රාහ්මණ රූපභෝගා සද්දභෝගා ගන්ධභෝගා රසභෝගා ඵෝට්ඨබ්බභෝගා, තේ තථාගතස්ස පහීනා උච්ඡින්නමූලා තාලාවත්ථුකතා අනභාවංකතා ආයතිං අනුප්පාදධම්මා. අයං ඛෝ බ්‍රාහ්මණ පරියායෝ, යේන මං පරියායේන සම්මා වදමානෝ වදේය්‍ය “නිබ්භෝගෝ සමණෝ ගෝතමෝ”ති, නෝ ච ඛෝ යං ත්වං සන්ධාය වදේසීති.

අකිරියවාදෝ භවං ගෝතමෝති. අත්ථි ඛ්වේස බ්‍රාහ්මණ පරියායෝ, යේන මං පරියායේන සම්මා වදමානෝ වදේය්‍ය “අකිරියවාදෝ සමණෝ ගෝතමෝ”ති. අහං හි බ්‍රාහ්මණ අකිරියං වදාමි කායදුච්චරිතස්ස වචීදුච්චරිතස්ස මනෝදුච්චරිතස්ස, අනේකවිහිතානං පාපකානං අකුසලානං ධම්මානං අකිරියං වදාමි. අයං ඛෝ බ්‍රාහ්මණ පරියායෝ, යේන මං පරියායේන සම්මා වදමානෝ වදේය්‍ය “අකිරියවාදෝ සමණෝ ගෝතමෝ”ති, නෝ ච ඛෝ යං ත්වං සන්ධාය වදේසීති.